फाइल तस्विर
काठमाडौँ, १४ भदौ। रसुवास्थित भोटेकोशी नदीमा फेरि बाढीको बहाव एक्कासि बढेको छ। नदीमा बाढीको ठूलो आवाज सुनिएको भन्दै जिल्ला प्रहरी कार्यालय रसुवाले पूर्वसूचना जारी गरेपछि बाढी पूर्वानुमान महाशाखाले तटीय क्षेत्रमा उच्च सतर्कता अपनाउन अपिल गरेको छ।
महाशाखाका अनुसार रसुवा, नुवाकोट र धादिङ भएर बहने भोटेकोशी तथा त्रिशूली नदी आसपासका तटीय क्षेत्रका बासिन्दालाई हाललाई सुरक्षित र सजग रहन आग्रह गरेको छ।
बिहान ४:३१ बजे प्राप्त सूचनाका आधारमा महाशाखाले नदी किनारका स्थानीयलाई सुरक्षित स्थानतर्फ सर्न र सतर्कता अपनाउन सूचित गरेको हो। जिल्ला प्रहरी कार्यालय रसुवाले परिस्थिति निगरानी गरिरहेको र घटनाबारे थप पुष्टि हुनासाथ विस्तृत विवरण सार्वजनिक गरिने जनाएको छ।
जल तथा मौसम विज्ञान विभाग र बाढी पूर्वानुमान महाशाखाले नदीको जलसतह लगातार अनुगमन गरिरहेका छन्। यसअघि भद्र १० गतेको बाढीले ठुलो र अकल्पनीय क्षति गरिसेकेको छ ।
